கறுப்புப்பெட்டி

இரட்டை அர்த்ததில்
பேசும் போது
புரிந்து கொண்டாலும்
எதுவும் நிகழாதது போல
பேசிக் கொண்டிருப்பாய்

பார்வையை
சரியாக கணித்துக் கொண்டு
மிக இயல்பாய்
சரி செய்துகொள்வாய்
மேல் தாவணியை

முகம் பார்த்து பேசுகையில்
என் பார்வை தடுமாற்றத்தை
பத்திரப்படுத்திக் கொள்ளும்
உன் கறுப்புப் பெட்டியை
உடைத்துப் பார்க்க வேண்டும்

என்னிடமிருந்து
எதை எதையெல்லாம்
சேமித்து
வைத்திருக்கிறாயென.

சந்திப்புகள்

சந்தோஷம் தொலைத்த
பொழுதொன்றில்
புறப்படுவேன் உன்னிடம்...

தனிமைகளற்ற நெருக்கடியில்
குலுங்கித் தவிக்கின்றன
உன் வளையல் கரங்கள்

ஒதுங்கி சைகைகளில்
தனிமைப்படுத்துவாய்
சாமி அறைக்குள்

குறுக்கிட்டு அழைக்கும்
யாருடையதோ -
கொலுசுச்சத்தம்

போகட்டுமென அவசரத்தில்
பகிர்ந்து கொண்ட
முத்தத்தின் சுவை
ஞாபகத்தில் இல்லை

உனக்கெப்படியென
கேட்க்கமுடியாது
புறப்படும் அவசியம்
நேருமெனக்கு

உள்ளங்கை அழுந்த
அழுத்திக்கொள்ளும்
மிச்சத்தில்
வாழ்ந்துகொள்வேன்
மறுபடியும் உன்னை
சந்திக்கும்வரை.

தாத்தாவின் கவிதை

அண்ட வெட்டிகினு இருந்தவன
நாலஞ்சுபேரா வந்து

"யோவ் தாத்தா வந்து
ஓட்டு போட்டுட்டு வந்துறு"-ன்னு
கூப்டதுக்காக

கட்டுன கோவணத்தோட ஓடியாந்து
ஓட்டுப் போட்டு
இவனுவள சட்டசபைக்கு அனுப்பி
எங்களுக்கு ஏதாச்சும் செய்யுங்கடான்னா...

மசுருப்புடுங்கியானுவோ
மைக்கப் புடுங்கி அடிச்சிகிட்டு
சட்டசபைல கபடி விளையாடுறானுவ!

கொட்டாங்குச்சி மார்பகம்

பறை அதிர
உயிர் அதிரும்
சாவு வீட்டில்

ஊத்திக்கொண்ட போதைக்கு
அடிபட்டு கிழியும்
பறை மேளமும்
சட்டி மேளமும்

மாருக்கு வலிக்காது
மார் அடிக்கும்
மருமகள்களின் ஒப்பாரிகளில்
சுதி ஏதும் இருப்பதில்லை

தப்பு மேளக்காரனை
"என்னா அடி அடிக்கிறீங்க...
விளாசுங்கடா"
என வீராப்பாய் பேசி
பறைசாற்ற வேண்டும்
பங்காளி என்பதை நிரூபிக்க

யாருக்கும் தெரியாமல்
பொம்பளை வேசங்கட்டிய
உரிமை செட்டுக்காரனின்
கொட்டாங்குச்சி
மார்பு குலுக்கலை
ஏக்கத்தோடு பார்த்திருக்கலாம்
என்னைப்போலவே
துக்கம் விசாரிக்க வந்த
வேறுசிலரும்.

ஓடி விளையாடு காதலே 3

காதலை
பகிர்ந்துகொள்ள
கோயிலுக்கு சென்றோம்,
காமத்தை
பகிர்ந்து கொடுத்தது
கோயில் சிற்பங்கள்.

ஓடி விளையாடு காதலே 2

சதை கிழித்து
ரத்தம் கொட்டி
பெரிய சிராய்ப்புகள்
ஏதுமின்றி
அதனளவு வலியை
தரவல்லது -
ஆணுக்கு பெண்ணுடையுதும்
பெண்ணுக்கு ஆணுடையதுமான
மிக அந்தரங்கமான
பார்வைகள்.

ஓடி விளையாடு காதலே 1

கட்டுக்கடங்காத உன்
பார்வை மழை
என் காதல் ஏரியை
உடைத்துப்போட்டுவிட்டது...
நீதான் கொடுக்கவேண்டும்
முத்த
நிவாரண நிதி!